Álfheima- og Trölladyngjufréttir

Í febrúar eru skemmtilegir fastir viðburðir, þá gerum við okkur glaðan dag. Á degi leikskólans lékum við okkur með ljós og skugga og komu börnin með vasaljós að heiman og léku sér með það á leikskólanum. Við héldum upp á bolludag með fiskibollum og rjómabollum, fengum okkur saltkjöt og baunir á sprengidag og að síðustu þá var öskudagur haldinn hátíðlegur með balli, kötturinn sleginn úr tunnunni, horft á bíó og borðaðar pulsur í hádeginu.

Við héldum líka upp á mæðradaginn og buðum ömmum og mömmum í kaffi og snúða, sem börnin bökuðu.

Við erum í áframhaldandi samstarfi við myndlistarskólann og byrjuðu fyrstu tveir hóparnir núna í febrúar og fara seinni hóparnir í mars. Þau börn sem fara í Myndlistarskólann eru fædd árið 2013. Þar eru þau að vinna með ljós og skugga á margvíslegan hátt.

Í febrúar fóru elstu börnin í heimsókn í Vesturbæjarskóla. Þau tóku þátt í frímínútum og fóru síðan í val með fyrsta bekk. Það gekk mjög vel og var gaman fyrir þau mörg hver, að hitta systkin sitt og gamla félaga frá leikskólanum. Elsti hópurinn fór líka í útinámsferð í Gufunes.Við vorum mjög heppin með veður og var því strætóferð í Gufunesið, gangan og að sitja úti, hlusta á sögur um álfa og drekka kakó einstaklega gaman.

Við enduðum febrúar á brúðuleikritinu Íslenski fíllinn eftir Bernd Ogrodnik. 

Við erum búinn að hafa hjá okkur þrjá norska leikskólakennaranema, þær heita Linn, Irmelin og Helena. Þær voru hjá okkur í fimm vikur og unnu margskonar verkefni ásamt því að fara í ferðir og leika við börnin. Það er því óhætt að segja að marsmánuður einkennist af þeirri heimsókn.

Við héldum áfram að vinna með söguna um Dimmalimm og erum við að undirbúa okkur í að sýna afrakstur frá þeirri vinnu á Barnamenningarhátíð í Borgarbókasafninu 17 - 22 apríl.

Gleiðilega páska

Að lokum minnum við á myndasíðuna okkar ☺
Kveðja frá Álfheima- og Trölladyngjubúum

Álfheima- og Trölladyngjufréttir

Í desember lok flutti Valeria til Rússlands og kvaddi okkur hér í Dvergasteini. Við óskum henni góðs gengis í nýjum leikskóla.

En hingað til okkar komu einnig gömul og ný nöfn, á Trölladyngju tókum við vel á móti Muhammed, sem byrjaði hjá okkur um miðjan mánuðinn. Álfheiður Mía er komin frá Grikklandi og bjóðum við hana velkomna á Álfheima ásamt Christinu sem kom til okkar frá Hagaborg. Í lok janúar kom Jason í heimsókn, hann er frændi Alex á Álfheimum. Jason býr í Þýskalandi en ætlar að fá að vera hjá okkur í nokkrar vikur.

Árið fer vel af stað hjá okkur. Við kvöddum jólin föstudaginn 5.desember með dansi og söng í salnum.
Mánudaginn 8. janúar lögðum við inn ævintýrið um Dimmalimm og er gaman að sjá og heyra hvað börnin hafa öll tileinkað sér hana. Í salnum erum við að vinna að sameiginlegu verki allra barnanna á Álfheimum og Trölladyngju. Þetta verk ætlum við að hafa lifandi og bæta í það fram eftir vori.

Elstu börnin voru mörg hver farin að spyrja eftir verkefnabókunum sínum sem við höfum verið að vinna með í hópastarfi elstu barna. Við höfum byrjað aftur á þeim og lögðum áherslu á tölustafina 1 – 5. Fórum í 12345 Dimmalimm, töldum aftur á bak og áfram og bjuggum til alls kyns mengi með mismunandi fjölda barna eða hluta inn í.

Hópastarf yngri árganga er einnig komið á fullt og er þar mikil áhersla á Dimmalimm í máli og myndum.

Í umhverfismenntinni hefur veðrið leikið okkur grátt, við höfum lítið komist út fyrir skólalóðina en höfum þeim mun meira rætt um veðrið og tilbrigði þess. Einnig hafa verið gerðar tilraunir og umræður í kringum þær.

Þorrablótið var vel heppnað og litlu þjóðminjasöfn deildanna komu skemmtilega út. Börnin voru dugleg að segja okkur frá því sem þau komu með á safnið. Um morguninn tókum við á móti pöbbum og öfum af öllum stærðum og gerðum og gæddum okkur á hafragraut og slátri. Í hádeginu sungu börn og fullorðnir minni karla og kvenna áður en við fengum okkur þorramat.

Mánudaginn 22.janúar fórum við með elstu börnin í Árbæjarsafnið á sýningu sem heitir „Að þreyja þorrann“. Við vorum svo heppin að safnið bauð upp á rútu báðar leiðir.

Að lokum minnum við á myndasíðuna okkar 
Kveðja frá Álfheima- og Trölladyngjubúum

Álfheima- og Trölladyngjufréttir

Eftir heimsókn Þórdísar Arnljótsdóttur með leikritið um Grýlu og jólasveinana var undirbúningur jólanna hafinn.
Jólaskrautið var sett upp og við fengum nýjar stjörnur í gluggana okkar.

Á mánudögum áttum við notalegar aðventustundir, sungum jólalög og kveiktum á kerti á aðventukransinum. Við eigum margar hefðir í leikskólanum í desember, eins og að hittast í salnum og baka brauðkarla og piparkökur sem foreldrar gæða sér á í morgunkaffi.

Jólagjöfin spilaði stórt hlutverk og allt í kringum hana. Börnin byrjuðu á því að teikna sínar hugmyndir að jólagjöfum og bjuggu þær síðan til í trölladeigi. Þegar það var þornað máluðu þau gjöfina og pökkuðu henni inn.

Það var líka farið í bæjarferð, dansað kringum jólatréið á Austurvelli, kíkt í ráðhúsið dáðst að jólaljósum og skrauti ásamt því að fara á Borgarbókasafnið þar sem lesin var fyrir okkur jólasaga. Nemendur á blásturshljóðfæri komu og heimsóttu leikskólann, þau spiluðu jólalög. Að lokum var jólaball þar sem Stekkjastaur kom og heimsótti okkur, dansaði kringum jólatréið og gaf börnunum mandarínu.

Árið endaði vel og höldum við inní nýtt ár full tilhlökkunar með nýja sögu og ný ævintýr.

Að lokum minnum við á myndasíðuna okkar 
Kveðja frá Álfheima- og Trölladyngjubúum

Álfheima- og Trölladyngjufréttir

Það er ýmislegt sem á daga okkar hefur drifið í október og nóvember og ætlum við að stikla á stóru hér í þessu fréttabréfi.

Í umhverfismennt hafa öll börnin notið þess að fara í gönguferðir í nánasta umhverfi skólans og unnið svo verkefni hér í húsinu þess á milli. Yngri börnin hafa lagt áherslu á fugla, tré og litina í umhverfinu okkar. Þau hafa gert verkefni þar sem við rifjum upp ferðirnar, skoðum bækur og myndir. Eldri hópurinn tók upp kartöflur, fór í gönguferðir, týndi rusl og gerði tilraunir með vatn og liti.

Í hópastarfi yngri hópsins var áfram unnið með fjölskylduna hjá yngri börnunum og það sem gerist á haustin. Kettlingahópur fór í gönguferðir að heimilum hvers og eins í hópnum og unnu þau svo verkefni í framhaldi af því. Lóuhópur vann áfram í fjölskyldubókinni og gerði verkefni um fugla.

Í hópastarfi eldri barnanna höfum við unnið áfram í bókinni okkar og höfum við lagt sérstaklega mikla áherslu á tölur, fjölda og form. Samhliða því erum við markvisst að leika okkur með hljóð og rím.

Þema lestrarhátíðarinnar í ár var Benedikt Gröndal og ákváðum við að taka þátt í því verkefni líkt og undanfarin ár. Við unnum með fugla sem Benedikt hafði teiknað og valdi hvor deild fyrir sig fugl til að vinna með. Börnin á Álfheimum ákváðu að vinna með Svartþröst og börnin á Trölladyngju völdu Rjúpuna. Þetta var heilmikil og skemmtileg vinna sem endaði á því að allir fóru í heimsókn í Gröndalshús, þar sem Lára Aðalsteinsdóttir tók á móti okkur og sýndi börnunum myndir, las fyrir þau og lagði fyrir þau verkefni.

Í byrjun október fóru elstu börnin í Sleipnisstund á Borgarbókasafnið. Þar hittu þau Sleipni sjálfan og vinkonu hans, sem las fyrir þau Vetrarævintýri Sleipnis.
Við héldum upp á bleika daginn föstudaginn 13.október, flestir mættu í bleiku og Ásdís bakaði súkkulaðiköku með bleiku kremi fyrir alla.

Duo Stemma var með frumsýningu á nýju verki í salnum í Drafnarsteini um miðjan október mánuð. Það eru Herdís Anna Jónsdóttir og Steef Van Oosterhout sem skipa Duo Stemma.

Föstudaginn 27.október var alþjóðlegi bangsadagurinn, sem við héldum að sjálfsögðu upp á. Við mættum í náttfötunum með bangsa í leikskólann, fengum okkur ristað brauð og kakó í salnum og dönsuðum svo á bangsaballi í salnum.

Þann 8.nóvember var baráttudagur gegn einelti og gerðum við honum hátt undir höfði. Þar sem litur dagsins er grænn nýttum við hann og stimpluðum á blöð með grænum höndum, sem tákn um vináttu.

9.nóvember var svo elstu börnunum boðið í Þjóðleikhúsið að sjá sýningu eftir Bernd Ogrodnik.

Á degi íslenskrar tungu, 16.nóvember, örkuðum við svo í halarófu niður í Borgarbókasafn þar sem við sungum 3 lög fyrir fullan sal af fólki. Við vorum öll mjög ánægð með þessa skemmtilegu stund í bókasafninu og þökkum öllum kærlega fyrir komuna.

Miðvikudaginn 29.nóvember fengum við í þriðja sinn Grænfánann í Dvergasteinshúsinu og Drafnarborgin flaggaði honum í fjórða sinn. Elstu börnin tóku þátt í báðum athöfnunum.

Við slúttuðum svo nóvember á leikriti í salnum sem markar svolítið upphafið á jólaundirbúningnum hér í leikskólanum. Hún Þórdís Arnljótsdóttir mætti á svæðið með leikritið um Grýlu og jólasveinana líkt og hún hefur gert undanfarin 19 ár.

Að lokum minnum við á myndasíðuna okkar 
Kveðja frá Álfheima- og Trölladyngjubúum