Drafnarborg fagnar í dag 70 ára stórafmæli. Af því tilefni verður efnt til afmælisveislu með börnum og starfsfólki í litlum hópum eins og leikskólastarfið býður upp á um þessar mundir.
Leikskólinn Drafnarborg tók til starfa 13. október 1950 og var fyrsti leikskóli borgarinnar sem teiknaður var sem barnaheimili og byggður með þarfir ungra barna í huga. Arkitekt hússins var Þór Sandholt. Leikskólinn var rekinn af Barnavinafélaginu Sumargjöf fram til ársins 1987 þegar Reykjavíkurborg tók við rekstrinum. Þá var Bryndís Zoëga leikskólastjóri og hafði gegnt þvístarfi frá upphafi. Alls starfaði hún í 41 ár á Drafnarborg.
Skólalóðin við gömlu Drafnarborg hefur nú tekið stakkaskiptum. Hún hefur að fullu verið endurgerð með tilliti til þess að skólinn þjónar nú alfarið leikskólabörnum á aldrinum 1-2 ára. Einnig voru gerðar breytingar innan húss til að skapa sem besta aðstöðu fyrir yngstu leikskólabörnin en 26 börn á aldrinum 1-2 ára dvelja þar nú á tveimur deildum.
https://reykjavik.is/frettir/drafnarborg-fagnar-sjotugsafmaeli
